Ályktun frá Félaginu Ísland-Palestína: Réttlæti fæst ekki með hóprefsingu og mannréttindabrotum

Mánudagur 14. júlí 2014 | Einar Steinn Valgarðsson

Það hefur vakið athygli í heimsfréttum undanfarið að þriggja ísraelskra unglinga, Eyal Yifrach, 19 ára og Naftali Fraenkel og Gilad Shaer, báðum 16 ára, sem búsettir voru í landtökubyggðum Ísraela á herteknu landsvæði Palestínumanna, var saknað frá og með 12. júní og fundust þeir nýlega myrtir. Umheimurinn hefur réttilega fordæmt þessi morð og tekur félagið undir það, enda eru morð á borgurum aldrei réttlætanleg, hvar og hvenær sem þau eru framin. Sú staðreynd að ungmennin voru búsett í ólöglegum landtökubyggðum breytir jafnframt engu um borgaralega stöðu þeirra gagnvart alþjóðalögum.

Minna hefur hins vegar farið fyrir fréttum af Palestínumönnunum sem drepnir voru af Ísraelsher, og voru þeir sjaldnast nafngreindir. Þegar þetta er skrifað hefur Ísraelsher orðið allavega 6 Palestínumönnum að bana. Þannig var Muhammed Dudeen, 5 ára, myrtur af ísraelska hernum föstudaginn 20. Júlí þegar herinn réðst inn í þorpið hans, sem er í grennd við Hebron. Mustafa Hosni Aslan, 22 ára piltur frá Qualandia-flóttamannabúðunum, var skotinn í höfuðið af Ísraelsher og lést af sárum sínum samdægurs. Ahmed Fahmawi, 26 ára, var skotinn til bana í flóttamannabúðum nærri Nablus og Mahmoud Ismael Atallah lést af skotsárum sínum af völdum Ísraelshers í Ramallah. Þá var Ahmed Sabarren, 19 ára skotinn til bana þegar Ísraelsher réðst inn í Al-Jalazoun flóttamannabúðirnar, norðan við Ramallah og Yousef Abu Zagha, 16 ára, var skotinn af hernum þegar herinn réðst inn í flóttamannabúðirnar í Jenín.
Við þetta má svo bæta að palestínskur karlmaður á miðjum aldri, Hajj Jamil Ali Jaber Souf, lést af hjartaslagi eftir að Ísraelsher ruddist inn á heimili hans og réðst á hann. Frændi hans segir að herinn hafi jafnframt hindrað að hann fengi læknishjálp í kjölfarið.

Sömuleiðis berast hroðalegar fréttir af hefndaraðgerðum, þannig fannst Muhammad Hussein Abu Khdeir myrtur í Jerúsalemskógi, í hefndarskyni að því er talið er. Samkvæmt krufningu mun hann hafa verið brenndur lifandi. Landtökumenn óku á hinn 28 ára gamla Ashraf Idrees í Hebron og hina níu ára gömlu Sanabel Mohammed Tus nærri Betlehem, en Sanabel er nú á spítala og berst fyrir lífi sínu. Afdrif Ashrafs eru ekki ljós þegar þetta er skrifað.

Palestínumenn hafa búið við grimmilegt hernám Ísraela, landtökur, kúgun og ofsóknir í tæplega 50 ár, raunar 66 ef talið er frá stofnun Ísraels, sem Palestínumenn kalla Nakba, eða ‘hörmungarnar’, en áætlað er að þá hafi um 700.000 Palestínumenn hrakist á flótta og verið sviptir landi sínu, heimili og eigum.Ofbeldisaldan núna er hins vegar að ná hæðum sem hafa ekki sést frá því í seinni intifödunni, uppreisn Palestínumanna gegn hernámi Ísraels, en hún hófst árið 2000. Herinn gerir fjöldainnrásir í borgir og þorp Palestínumanna, hundruðir manns hafa verið handteknar og yfir hundrað hús eyðilögð. Loftárásir á Gaza eru þær mestu í tvö ár. Ofsóknir og ofbeldi landtökufólks gagnvart Palestínumönnum er jafnvel enn verra en það hefur verið til þessa og ísraelsk yfirvöld boða hertari aðgerðir og fjölgun ólöglegra landtökubyggða.

Ráðamenn í Ísrael kenna annari stærstu stjórnmálafylkingu Palestínumanna, Hamas, um morðin og segjast hafa sannanir fyrir því. Þau meintu sönnunargögn hafa þó ekki verið lögð fram og Hamas sver af sér aðkomu. Þegar ungmennana var saknað fordæmdi Mahmoud Abbas, forseti Palestínumanna, verknaðinn en jafnframt aðgerðir Ísraela gegn palestínskri alþýðu. Hins vegar fór ríkisstjórn Ísraels í litlar grafgötur með að ætlun þeirra væri í og með að sundra þjóðstjórn Palestínumanna. Í því skyni beita ísraelsk yfirvöld palestínsku þjóðina hóprefsingu, þvert á alþjóðalög.

Félagið Ísland-Palestína tekur undir kröfur friðar- og mannréttindasamtaka víðs vegar um heim. Þannig krefst félagið að mannréttindi íbúa svæðisins séu virt og fordæmir öll morð, ofbeldi, ofsóknir, kúgun og hóprefsingu gagnvart almennum borgurum. Félagið telur það jafnframt réttmæta kröfu að allir slíkir gerendur verði látnir svara til saka í samræmi við alþjóðalög. Félagið krefst þess sérstaklega að hóprefsingu, ofsóknum og kúgun gagnvart Palestínumönnum linni, bundinn verði endir á grimmilegt hernám Palestínu, sjálfsákvörðunarréttur Palestínumanna sé virtur og krafa þeirra til sjálfstæðs ríkis. Aðeins með virðingu fyrir réttmætum kröfum og mannréttindum er von á varanlegum friði milli Ísraela og Palestínumanna.

Frekari upplýsingar fást hjá
Sveini Rúnari Haukssyni, formanni Félagsins Ísland-Palestína s. 6167857
Einari Steini Valgarðssyni, stjórnarmanni í félaginu Ísland-Palestína, 8629167