Flóttamannabúðirnar Balata

Balata eru fjölmennustu flóttamannabúðir Vesturbakka Palestínu. Þar búa yfir 20.000 flóttamenn við mikil þrengsli og við fátækt. Búðirnar voru settar á laggirnar árið 1950 og eru íbúarnir flestir frá Yaffa svæðinu, sem í dag tilheyrir Ísrael. Þrátt fyrir samþykktir Sameinuðu þjóðanna (nr. 194 og fleiri) um að palestínskir flóttamenn eigi að fá að snúa aftur til heimkynna sinna hefur íbúum Balata, líkt öðrum palestínskum flóttamönnum, verið neitað um þann rétt sinn í yfir hálfa öld.

Flóttamannabúðirnar, sem eru staðsettar nærri borginni Nablus á norðurhluta Vesturbakkans, voru fyrst um sinn aðeins stór tjaldborg. Þegar í ljós kom að bið yrði á að flóttamennirnir fengju að snúa aftur var steyptum bráðabirgðar-húsum og skýlum komið upp. Í dag sér Palestínuflóttamannahjálp S.Þ. (UNRWA) íbúum Balata fyrir heilsugæslu og menntun - en engu að síður er mikill skortur á slíkri þjónustu. Flestir íbúana lifa undir fátæktarmörkum og síðan síðari Intifada uppreisn Palestínumanna hófst hafa þeir þurft að þola gífurlegt atvinnuleysi.

Íbúar Balata hafa tekið virkan þátt í báðum Intifada uppreisnum Palestínumanna (1987-93 og 2000-?) fyrir mannréttindum sínum og gegn hernámi Ísraela í Palestínu. Hverfisnefndir búðanna eru öflugar að skipuleggja mótmæli, verkföll, sniðgöngu á tilskipunum hersins og útigangsbönnum og aðra friðsamlega andspyrnu. Tilgangur þeirra er að taka völdin úr höndum hernámsliðsins á sem flestum sviðum samfélagsins svo íbúarnir geti sjálfir stjórnað sínu daglega lífi. Íbúar Balata hafa orðið illa úti í stanslausum innrásum og umsátrum hernámsliðins síðustu ár með tilheyrandi drápum, limlestingum, hópfangelsunum og eyðileggingum heimila fólks.

Frekari upplýsingar um Balata:
*Síða Palestínuflóttamannahjálpar Sameinuðu þjóðanna um Balata
*Síða Project Hope um Balata